"En Blimea tienen fama de bonos cocineros y damos fe de que, polo menos na Sidrería San Mamés, la fama ye merecida, y eso que’l primer platu que pidimos lleva una preparación llaboriosa, y precisa de munchu tinu pa nun pasase nin quedase escasu. Les cebolles rellenes son amás un platu perasturianu que, inxustamente, nun tien la resonancia d’otros comu la fabada o el más reciente cachopu. Quiciás el so nome suene humilde y la so apariencia engañe, pero son una delicia que combina perbién el dolzor de la cebolla col saborgu del rellenu, nesti casu de carne, compaxinando testures y tastos nuna receta tan pocu común comu rica. Menos tradicional pero igualmente esquisito, les carrilleres de Wagyu, trayíes de la Finca Santa Rosalía y preparaes al puntu, con abondosa y saborgosa salsa, pa rellambese... y pa repetir. De postre, tarta casero de quesu, con una receta que se sal un pocu de lo avezao pa esta llambioná, perrico. Tou ello acompangao por unes botellines de sidre del llagar Viuda de Palacio."
